Umthethwandaba weHigh Court lamuhla unqume ukuthi amapholisa kumele ahambise unobhala jikelele weMDC ekhokhelwa nguMnu Morgan Tsvangirai, uMnu Tendai Biti emthethwandaba kusasa ukuthi etheswe icala angaba ebhekane lalo.
Igqwetha elimela u Biti, yena obotshwe izolo esetheswa icala lokuzama ukugenqula uhulumende, uMnu Selby Hwacha utshele iStudio 7 ukuthi baphatheke kakubi ngokubotshwa kuka Biti ngoba bengakwazi lokuthi ungaphi. Kodwa uthi bakhangelele ukuthi amapholisa ahloniphe isinqumo somthethwandaba bemuse kuwo kusasa.
Kusenjalo, amapholisa lamhlanje athathele uMnu Tsvangirai ibhasi yakhe yokukhankasa ekade ehamba ngayo lequla lakhe bekhankasela ukhetho oluzayo eGweru.
Ngeviki edluleyo amapholisa amthethathele njalo uvava lwemota yohlobo lweBMW X5 abehamba ngayo ekhankasela ukhetho eLupane. Umsekeli kaTsvangirai uNkosazana Thokozani Khuphe utshele uNtungamili Nkomo weStudio 7 ukuthi injongo yamapholisa yikubavimba ukuthi bengenelisi ukubhoda ngelizwe bedinga usekelo, kodwa uthi lokhu kakubephuli imoya.