Usane olulenyanga eziyisithupha lulimele okwesabekayo ngemva kokuphoselwa phandle kwendlu yomelekaniswa embare ngabasekeli beZanu PF.
Iqembu labasekeli beZanu PF elaziwa ngokuthi Chipangano libikwa lenze lokhu njengendlela yokujezisa unina walumntwana okadesala ukuphuma emzini wakhe exotshwa ngamalunga aleliqembu akade exotsha abasekeli bonke bebandla leMDC emizini yabo esithi bavotelani uMnu. Tsvangirai umkhokheli weMDC.
Lisiyatshona elalamuhla kubikwa besekulemuli ezingmatshumi amane ebesezixotshiwe ezindlini eMbare ngoba zisekela ibandla leMDC. Isikhulumi seMDC uMnu. Nelson Chamisa utshele iStudio 7 ukuthi inani lamalunga abo elithunjwa lokutshaywa ngabasekeli beZanu PF seliqanse okumangalisayo.
Kolunye udaba lodlakela lwezombusazwe abasekeli beZanu PF babikwa betshaye kabuhlungu izakhamuzi zakoChiundura enkabazwe. Unobhala obona ngezokhetho enkabazwe, uMnu. Obert Ncube utshele uChris Gande weStudio 7 okwenzakalayo kulesosigaba.
