Laloba umthethwandaba unqume ngomgqibelo ukuthi amapholisa kumele ahambise unobhala jikelele weMDC ekhokhelwa nguMnumzana Morgan Tsvangirai, uMmnumzana Tendai Biti enkundleni lamuhla etheswe amacala abhekane lawo, lokhu akusenzakalanga. ngalokhu, amagqwetha kaBiti athi azakhweza isicelo emthethwandaba waphezulu esokuthi uBiti akhululwe, ngoba ukugcinwa kwakhe esitokisini kungekho emthethweni.
UBiti, yena obotshwe ngoLwesine esanda fika enkundleni yeHarare evela kweleSouth Africa, ubikwa engasasiwanga emthethwandaba ngoba amapholisa esithi afuna ukumethesa amanye amacala njalo. Okwakhathesi wetheswa icala lokufuna ukugenqula uhulumende, lelokufuna ukuphazamisa isimo elizweni, okuyiwo amacala awabotshelweyo. amagqwetha kaBiti athi amapholisa asefuna ukumethesa icala lokuthuka uMongameli Robert Mugabe lelokukhuluma izinto ezingabangela ukungahlaliseki kwabe butho. Kodwa amagqwetha la athi uBiti kumele athoniswe amacala ayiwo awabotshelweyo hatshi la amatsha asedingwa ngamapholisa.
U Brenda Moyo weStudio 7 ukhulume lomsekeli wesikhulumi kubandla leli uNkosazana Thabitha Khumalo othi uhulumende weZimbabwe ufuna ukusebenzisa uBiti njengesibonelo ukwethusela abasekeki be MDC.
Ezinye Indaba ZeStudio 7....
