Umongameli Robert Mugabe, uthi abantu bengavela balokothe bavotele uMnu. Morgan Tsvangirai, ongomunye ozanctinisa khukhetho lokudinga umongameli kuviki ezayo, anqobe, yena lababengabalweli bempi yenkululeko abazabuyela egangeni bayelwela ukukhulula ilizwe ngoba kuyabe kufanana lokuthi selibuyele kwabamhlophe.
UMugabe, ubekhuluma la amazwi erallyini yokuzikhankasela kulolukhetho, e White City Stadium ko Bulawayo lamuhla emini.
UMugabe uphindile amazwi athi umbhobho yiwo olamandla okwedlula usiba okuyabe kuvotwa ngalo, esitsho ukuthi ibandla lakhe lizasebenzisa izikhali ukuphikisana lempumela yokhetho linganqotshwa.
UThabang Mathebula, intathelizindaba ye studio 7 obekulo umhlangano, utshele uSithandekile Mhlanga we studio 7 okunengi okwenzakeleyo..
Kunjalo-nje, iziphathamandla zecele le MDC elikhokhelwa nguMnu. Morgan Tsvangirai zibikwa zisethula imbiko etshiyeneyo ngokuthi umkhokheli wazo uyangena kukhetho lokudinga umongameli olwenziwa kuviki ezayo kumbe hatshi.
UMnu. Innocent Gonese utshele iphephandaba le AFP ukuthi bayangena kukhetho ngoba ukuhlehlela emuva akuncedi, kodwa uMnu Nelson Chamisa usetshele i Reuters ukuthi abasekeli balelibandla bathi kungangenwa kukhetho ngenxa yodlakela olukhona, njalo ibandla lakhe lisakucubungula lokhu, beselimemezela impumela yakho.
Isiphathamandla se ZANU PF, uMnu. Patrick Chinamasa ubikwa ehlezi ehleka lelibandla esithi liyazakala ngokwenza ingani alifuni ukungena kukhetho khona kusazakala ukuthi lizangena.
Isiphathamandla salelicele, uMnu Sam Siphepha Nkomo, utshele uSithandekile Mhlanga we studio 7 ukuthi ezinye inkulumo zibangelwa yikufuthelana okuyabe kukhona ngalesosikhathi ngoba ukungangeni kukhetho linyathela elikhulu okwesabekayo, elivunyelwana emhlanganweni we National Executive le National Council yalelibandla kuphela.
