I MDC sisole kakhulu imbiko ethulwe yisikhulumi samapholisa uMnu Oliver Mandipaka yokuthi udlakela soluhlehlile elizweni.
UMandipaka uphume kuphephandaba leHerald lamuhla esithi imbiko yokuthunjwa lokubulawa komka-khansila weHarare okhethwe ngamanye amakhansila ukuthi abe nguMayor kunsuku ezisanda kwedlula uMnu Emmanuel Chiroto ingamanga. Uthi imbiko yonke yodlakela kanye lokubulawa kwabantu eHarare ensukwini ezisanda kwedlula ayisiyo yeqiniso.
Ibandla leli lithi imbiko le ingamanga, lisithi udlakela luqhubekela phambili endaweni ezitshiyeneyo zelizwe abasekeli balo behlukuluzwa. IMDC ithi abasekeli bayo ababili batshiselwe izindlu eMberengwa izolo, kwathi eHarare izolo njalo abasekeli bayo abalitshumi lanhlanu abahlala eZengeza bathunjwe ngabeZanu PF ebusuku bayatshaywa kakubi enkambeni yalelibandla lapho abasakhulayo abahlukuluzela khona uzulu ophikisana lombuso kaMugabe.
Omunye wabatshayiweyo walimala kulolu dlakela obesesibhedlela seAvenues eselatshwa uNkosazana Wadzanai Chikoti, uthi abantu laba balimele kakubi. KoBulawayo khona iMDC ibika ukuthi kulabasekeli bayo abalitshumi abatshaywe kakubi ngamasotsha izolo.
Edolobheni leHarare kubikwa kulokufuthelana okubi, abasekeli beZanu PF sebebamba ngamandla uzulu nje labatshayeli babotshova ukuthi banamathisele amabhakane emfanekiso kaMugabe ezimoteni zabo.
Umsekeli wesikhulumi seMDC uNkosazana Thabitha Khumalo utshele uNtungamili Nkomo weStudio 7 ukuthi imbiko kaMandipaka ingamanga aluhlaza tshoko ngoba udlakela lumemetheka okwesabekayo elizweni.
