Inhlanganiso ezizimeleyo zithi kazisoze zinanze impumela yokhetho lwakusasa lokudinga umongameli zisithi kayisilo khetho ngamadlwane nje enziwa libandla leZanu PF.
Emihlanganweni eziyenzele koBulawayo lase Harare lamuhla inhlanganiso lezi, ezigoqela iCrisis in Zimbabwe Coalition, National Constitutional Assembly, Bulawayo Agenda lezinye, zibophe ukuthi uzulu kumele engaphatheki kukhetho lolu. Zithi zifuna ukuthi kulungisiswe umumo elizweni, kuqedwe udlakela andubana kwenziwe ukhetho olukhululekileyo phansi kwesisekelo sombuso esitsha.
Ziveze njalo ukuthi zifuna iZanu PF idilize inkamba zayo zonke lapho okuhlukuluzelwa khona uzulu. Ziphinde zagcizelela imbiko yeMDC zathi zifuna iSadc, African Union leUnited Nations zingenele kudaba lweZimbabwe njalo kubotshwe zonke izidlova zeZanu PF eziphehla udlakela.
Ezinye zalezi nhlanganiso zikhuthaza uzulu ukuthi eyevota kodwa ephambanise iphepha lokuvotela ukuze kube yilokhu okuthiwa yi spoilt vote ngesingisi. Zithi uzulu enze lokhu njengendlela yokuzivikela ukuthi engahlukuluzwa ngabatsha beZanu PF abethusela ukuthi bazathwalisa luklubhu bonke abangavotanga.
AbeZanu PF laba bathi ongavotanga bazamphawula ngokungabi le ink ephawula abavotileyo ezandleni. Umqondisi weBulawayo Agenda uMnu Gorden Moyo utshele uNtungamili Nkomo weStudio 7 ukuthi ukhetho lwakusasa kayisilo khetho ngoba umongameli Mugabe engancintiswa, yikhoke bekhuthaza uzulu ukuthi engaphatheki kilo.
