Inhlanganiso ye Human Sciences Research Council (HSRC), kwele South Africa sixwayise ukuthi kulakho ukuqhamuka impi elizweni nxa udaba lwezombusazwe lungalungiswanga ngokuphangisa.
Kugwalo elwethule lamuhla eJohannesburg linhlanganiso ithe ukulwisana phakathi kwabasekeli beMDC labeZanu PF sokufike kuzinga eliphezulu ngoba abasekeli beMDC labo sebesebenzisa udlakela ukuzivikela lapho behlaselwa ngabasekeli bebandla elibusayo.
Kusenjalo, omunye owesifazane ofuqelwe emlilweni ngabasekeli beZanu PF beze bemthole epheka ukudla kwemuli yakhe kumalnaga asanda kwedlula esigabeni seMashonaland Central ufile lamuhla. Lokhu kwenzakala udlakela luqhubekela phambili elizweni.
Lamuhla njalo kubikwa kuqhamuke ukulwisana okwesabekayo eShamva lapho okudibane khona abasekeli beMDC labe Zanu PF.
Iphephandaba leMelika, iLos Angeles Times libika ukutho selithole imbiko yokuthi udlakela lukhangelelwe ukumemetheka ngelizwe ngoba ibandla leZanu PF lifuna ukubamba ngamandla eleMDC ukuthi livume ukungena kuhulumende okhokhelwa nguMongameli Mugabe.
Owakhethwayo ukumela iLupane North edaleni lephalamende ekucele leMDC elikhokhelwa nguMnu. Arthur Mutambara, uMnu. Njabuliso Mguni utshele uChris Gande weStudio 7 ukuthi udlakela olukhona soludale ukufuthelana okubi elizweni.
