amalinks wokungena

Breaking News

Ngobani Ababangela Udlakela, Nganjongo Bani?


Ukuqhubeka kodlakela elizweni sokubangele ukwesaba lokufuthelana okukhulu. Abasekeli beZanu PF babikwa beqhubekela phambili ngokugongoda abasekeli beMDC lozulu mahlayana endaweni ezitshiyeneyo zelizwe.

Ngaphambilini kokhetho bekucatshangelwa ukuthi abasekeli beZanu PF laba bebetshaya abantu ukuze babethusele bavotele umongameli Robert Mugabe. Kodwa, laloba iMDC icine iphumile kulolukhetho ngenxa yaloludlakela – okwenze uMugabe wanqoba engancintiswanga, udlakela lulokhu luqhubeka lusiba lubi.

Umbuzo osuke uphice abanengi ngothi - kanti kungani iZanu PF iqhubeka ngaloludlakela uMugabe esebuyelile embusweni? Zona inkulumo eziqale eSouth Africa izolo phakathi kweMDC leZanu PF zilakho ukuluqeda na loludlakela kulungisiswe izinto elizweni?

Khona, loludlakela luphehlwa ngabeZanu PF kuphela na? Emizameni yokuthola impendulo yalimibuzo, sixhumanise isiphathamandla sebandla leMDC elikhokhelwa nguMnu Morgan Tsvangirai, uMnu Felix Magalela Mafa Sibanda lengcwethi ecubungula ezombusazwe uMnu Brilliant Mhlanga.

UMafa uthi ngaloludlakela, iZanu PF ijonge ukuthena iMDC iyiqede amandla ukuthi icine ingena kuhulumende kaMugabe. Kodwa uMhlanga uthi uMugabe yisigebenga esiqhubekela phambili ngomkhuba wodlakela esivele siwejwayele. Uthi into emangalisayo yikuthi amazwe womhlaba labanye abantu beZimbabwe bahlaba umkhosi ongaka uMugabe ebulele abantu abambwalwa bona babezithulele ngesikhathi ebulala abantu eMandebeleni ngesikhathi seGukurahundi.

Lingxoxo iqhubekela phambili kusasa uMafa lomhlanga betshukana ngodaba lodlakela lenhlupho ezibekhane leZimbabwe bexoxa loNtungamili Nkomo weStudio 7. Ungakhuthwa!

Ezinye Indaba ZeStudio 7...

XS
SM
MD
LG