Uhulumende wakwele South Africa usexwayise amazwe ensthonalanga ukuthi ekele ukuthatha izinqumo ezizaphazamisa imizamo yenhlanganiso yomanyano wamazwe eAfrica iAfrican Union yokuletha uxolo lokuthula eZimbabwe. Usole njalo umkhankaso wecele leMDC elikhokhelwa nguMnumzana Morgan Tsvangirai wokuthi kube lomunye njalo umlamlankuzi ozancedisana loMongameli Thabo Mbeki ekucazululeni inkinga yasezimbabwe.
Kunjalo nje, inkulumo ezilawulwa nguMongameli Mbeki wele south africa phakathi kwamacele omabili emdc lebandla elibusayo ele zanupf zikhangelelwe ukuqhubekela phambili kuyonale iviki.Iicele le MDC elikhokhelwa nguMnumzana Tsvangirai litshengisa ukungasuthiseki ngokuqhubeka kwenkulumo lezi. Kuthi icele elikhokhelwa nguMnumzana Arthur Mutambara lalo elikulezinkulumo lithi liyasuthiseka ngokuqhubeka osokwenze lezinkulumo livumelana lombono webandla leZanu PF elithi sokuseduzane ukuthi kulotshelwane isivumelwano sokuthi kuyini osokuzakhulunywa nguMongameli Robert Mugabe, uTsvangirayi loMutambara kunkulumo ezilandelayo.
Amazwe omhlaba agoqela eleBhilithane leleMelika laku European Union aqhubeka esekela imizamo yokuthi kubelenguquko elizweni. uNkosazana Condoleeza Rice obona ngezangaphandle kwelizwe leMelika ekhuluma eWashington DC namhla ukhuthaze inkokheli yamazwe eAfrica ukuthi ifuqe uMugabe ukuthi alethe inguquko elizweni njalo ingamhloniphi ngokuzingenisa ngenkani embusweni, engakhethwanga nguzulu wezimbabwe.
Inhloko kahulumende weBhilithane uMnumzana Gordon Brown ukhuthaza amazwe aku EU ukuthi engezelele izijeziso zenotho kunkokheli yebandla leZANU PF. Ubrown uthi okwakhathesi amazwe omhlaba azanika ithuba kumongameli Mbeki ukuthi aqhubeke ngenkulumo phakathi kweMDC leZanu PF, esithi nxa inkulumo lezi zingehlula kuzafuze amawe omhlaba abuyele njalo kumanyano weUnited Nations ukuze kudingwe isixazululo kudaba lweZimbabwe.
Icele leMDC elikhokhelwa nguMnumzana Tsvangirai lithi alisela themba kuMongameli Mbeki. istudio 7 ikhulume lomsekeli wesikhulumi secele leMDC elikhokhelwa nguMutambara, uMnumzana Renson Gasela othi, umlandu kaMbeki kayisiwo wokuthi alungise udubo lweZimbabwe,kodwa ngowokuthi amabandla ezombusazwe akhulumisane.
Ezinye Indaba ZeStudio7...
