AmaZimbabwe lezinye izizalwane zakwamanye amazwe abahlala ezinkambeni ngemva kokuhlaselwa kwabantu bakwamanye amazwe kwele South Africa sebemukele ngezandla zombili udaba oselukhwezwe emthethwandaba ngenjongo yokwenqabela uhulumende ukuthi avale lezo nkamba kungakabi lesiqiniseko sokuthi kabasoke betshaywe bengabuyela emphakathini.
Inhlanganiso ye Consortium For Refugees
and Migrants leye Wits Law Clinic lamhlanje zethule isicelo emthethwandaba weHigh
Court ePretoria zifuna inkundla yenqabele uhulumende ukuvala inkamba ezihlala
abakwamanye amazwe abadudulwe ludlame obe lubhekiswe ebantwini bokuza.
Lokhu kulandela isaziso sikahulumende sokuthi abahlala kulezi nkamba kufuze babe sebephumile mhla zilitshumi lanhlanu kule inyanga, ngoba lezo nkamba zizavalwa. Inhlanganiso lezi zombili zithi uhulumende kufuze aqale adalule obala indlela azavikela ngayo abakwamanye amazwe ukuze bangaphindi behlaselwe njalo nxa bengabuyela emphakathini.
