Icele le MDC elikhokhelwa nguMnu Morgan Tsvangirai lithi kulamalunga alo edale lePhalamende amabili abotshiweyo elungiselela ukungena kulelidale ukuyafungiswa lamuhla ekuseni.
Amalunga la nguMnu Elia Jembere kanye loMnu Sure Mudiwa. Ibandla leli lithi amapholisa ebefuna njalo ukubopha uMnu Elton Mangoma. Kodwa imizamo yamapholisa yehlule.
UMnu Jembere ubikwa engomunye wamalunga alelibandla ayisikhombisa avele edingwa ngamapholisa esithi alamacala athize, njalo kasenelisanga ukuyafungiswa.
Kodwa uMudiwa, yena obengekho kuluhlu lwabadingwayo, uphange wakhululwa wafungiswa labanye.
Umeli wesigaba seNkulumane koBulawayo uMnu Thamsanqa Mahlangu, njalo engumgcinisihlalo wabatsha kulelibandla, utshele uSithandekile Mhlanga weStudio 7 ukuthi kusobala ukuthi le bekuyimizamo yebandla le Zanu PF eyokwenqabela amalunga eMDC ukuthi aye ePhalamdende ukuyavotela uMlawuli walelidale ngobunengi bawo.
