UMongameli Robert Mugabe uthi uphakathi kokulungiselela uhulumende omutsha. Ekhuluma edilini lokunanza ukuvulwa kwedale lephalamende lelesenate izolo uMugabe uthe icele leMDC kaTsvangirai likhanya lingafuni ukungena kuhulumende womanyano ngoba lisithi umumo wezenotho uzagenqula umbuso kaMugabe kunyanga eziyisithupha ezilandelayo kodwa wathi lokhu akusoze kwenzakale. UMugabe usole kakhulu amalunga kahulumende wakhe osanda dlula esithi bekulabaphathintambo abangethembekenga. UMongameli Mugabe uthe kuyamangalisa ukuthi ilizwe lithenga ukudla okunjengetshukela kwamanye amazwe lona ilizwe lilima imfe enengi okwesabekayo. UMugabe uthe kuyamangalisa njalo ukuthi ilizwe lezimbabwe yilo elithiwa lilobuyanga obesabekayo khona emgwaqweni kugcwele imota ezintsha ezisanda kwethulwa. Icele leMDC elikhokhelwa nguMnu. Morgan Tsvangirai lithe ukusungulwa kukahulumende omutsha lokhu kutshengisa sobala ukuthi uMongameli Mugabe ufuna ukuphikisana lentando kazulu. Umsekeli kanobhala jikelele wecele leMDC kaMutambara, uNkosikazi Priscilla Misihairambwi Mushonga utshele uChris Gande weStudio 7 ukuthi bona vele kabasoze bangene kuhulumende kaMugabe nxa kungabanga lokuvumelanga kunkulumo ezilawulwa nguMongameli Thabo Mbeki wele South Africa.
