Amapholisa omvukela ahlome okwesabekayo, amasotsha labasekeli beZanu PF babikwa becithe umkhosi wokufungisa amakhansila eMakoni. Abasekeli beMDC eyiyo enqobe kukhetho lwamakhansili ngokuthola izihlalo ezingamatshumi amabili lantathu, abedlula amakhulu amathathu abakade bekulumkhosi babikwa betshaywe kabuhlungu ngezamboko.
IZanu PF yona ithole izihlalo ezilitshumi lasikhombisa. Abakhethwe ukuba ngamalunga edale lephalamende bengabe MDC abathi oMnu. Pishai Muchauraya, John Nyamande lo Prosper Mutseyani labo baxotshiwe ngabasekeli beZanu PF laba.
Kulabantu abathoba minwe
mibili abaze kulumkhosi besithi bakhethwe ngumphathintambo wezabelo, uMnu.
Ignatius Chombo phansi komthetho othi kumele kukhethwe abantu abazimeleyo babe
ngamalunga amakhansili. Lokhu yikho okubikwa kuvuse umsindo. Akulamuntu
obotshiweyo.
Isiphathamandla secele leMDC elikhokhelwa nguMnu. Morgan Tsvangirai enkabazwe, uMnu Obert Ncube utshele uChris Gande weStudio 7 ukuthi isehlakalo lesi siveza sobala ukuthi umumo awukaguquki elizweni kwezodlakela.
Kunjalo nje, ingcwethi ecubungula ezombusazwe zithi umthetho omutsha lo owokuthi kukhethwe abantu abazangena kukhansili bemele izifiso zikazulu, ama special interest, ususetshenziswa kubi yiZanu PF. Abantu abakhethwayo laba abalamandla okuvota njalo abamelanga babengabamabandla ezombusazwe kodwa bengavela kunhlanganiso ezitshiyeneyo ezigabeni. UMnu. Rejoice Ngwenya utshele uChris Gande weStudio 7 ukuthi iZanu PF ithatha ithuba lokusebenzisa lumthetho ngendlela engasiyo ngoba uzulu engawuzwisisi.
