UMongameli Mugabe wazise ngolweSine ukuthi ilanga lingayatshona ibandla leMDC lingalobanga igama egwalweni olukhona oluhlela indlela okumele kwabelwane ngayo amandla, uzaqhubekela phambili akhethe amalunga edale leCabinet, abumbe uhulumende omutsha.
Iphephandaba likahulumende ele Herald libika ukuthi uMugabe utshele intathelizindaba izolo eZambia ukuthi ukhethwe ngemfanelo njalo ulamandla wokubumba uhulumende wakhe laloba kulenkulumo ezikhona ezokwabelana umbuso.
UMugabe wethesa, ikakhulu umkhokheli welinye lamacele eMDC uMnu Morgan Tsvangirai umlandu wobugovu ngoba esithi ufuna amandla wonke anikezwe yena. Kodwa uTsvangirai uyakulandula lokhu.
UMugabe wethule amazwi la ngoba ebekhangelele ukuthi uMongameli weSouth Africa, uThabo Mbeki, ongumlamulankunzi kudaba lweZimbabwe, ubezakuya eHarare ngolweSine ukuyahlanganisa uMugabe ngokwakhe, uTsvangirai kanye loMnu Arthur Mutambara owelinye lamacele eMDC.
Kodwa uMbeki kasayanga eZimbabwe ngemva kokuba uTsvangirai emazise ukuthi yena uphandle kwelizwe.
Amacele womabili eMDC wona athi uMugabe engaqhubeka
ngokubumba uhulumende ongagoqeli lawamacele, uzakuba ephambanise kakhulu njalo lokhu
kuzakutsho ukutshabalala kwenkulumo.
Isiphathamandla seMDC kaTsvangirai, uMnu Sam Sipepa Nkomo utsele uNtungamili Nkomo weStudio 7 ukuthi laloba angakwenza lokhu kasoze avune lutho ngoba umnotho
lakho konke okungamanga kuhle elizweni kungasoze kuguquke.
Kunjalo nje, umsekeli wesikhulumi seMDC ekhokhelwa
nguMutambara, uMnu Renson Gasela laye ujamile wathi kuyabe kuyikuzibophela
uMugabe engalokotha abumbe uhulumende inkulumo zingakaphethwa kwavunyelwana.
UGasela ugcizelele njalo ukuthi nguhubhu kabhejane imbiko yokuthi ibandla lakhe lilakho ukungena kuhulumende weZanu PF.
Ekhuluma loNtungamili Nkomo weStudio 7, uGasela uthe nxa ekhona kubandla lakhe ongaqilwa yiZanu PF athathe isikhundla ayabe esinikiwe, uzahle exotshwe kulelibandla, kungakhathalekile kumbe nguMutambara ngokwakhe.
