Ngemva kokulosayinelana isivumelwano sombuso phakathi kwamacele omabili eMDC lebandla leZANU PF izolo, uzulu weZimbabwe usekhangelele inguquko, kwezombusazwe, ezenotho, inhlalakahle kazulu, ezempilakahle kanye lokunye okunengi. Abamabhizimisi bathi laloba kuzathatha isikhathi eside ukulungisisa ezomnotho, okuqakathekileyo khathesi yikuthi amabandla eMDC leZANU PF asetshengise ukuthi alesifiso sokusebenzelana ndawonye ekuthuthukiseni ilizwe.
Umqondisi wenhlanganiso yamabhizimisi abensudu iAffirmitive Action Group esigabeni seMatebeleland, uMnumzana Sam Ncube uthi okwakuqala okungenziwa ukuvusa umnotho, yikuthi elizweni kusetshenziswe imali yakwamanye amazwe ikakhulu iSouth African Rand.
