Ekuqhubekeni kokuxega kwesivumelwano sokubumba uhulumende womanyano idale lecentral committee eyeZanu PF lithi amacele womabili eMDC enza ubudlwangudlwangu elizweni. Owayelilunga lequla lenkulumo zokubumba uhulumende lo, uMnu. Patrick Chinamasa utshele iphephandaba le The Herald ukuthi iCentral Committee yebandla lakhe licele uMongemeli Mugabe ukuthi atshele uMnu. Tsvangirai ukuthi akhuze abasekeli bakhe ngodaba lodlakela athi luqale ngomvulo eHarare lwasabalala ilizwe lonke jikelele.
UChinamasa uthi njalo ibandla lakhe litshengise ukudana ngodlakela olwenzakala phandle kwehotela lapho okwakusayinwa khona isivumelwano, iRainbow Towers athi lwabangelwa ngabasekeli beMDC. Kodwa ingcwethi ecubungula ezombusazwe uMnu. Qhubani Moyo utshele uChris Gande weStudio 7 ukuthi yena usefike endaweni ezitsheyeneyo zelizwe kodwa kakezwa ukuthi kulodlakela lanxa inkamba zabasekeli beZanu PF zokuhlukuluza uzulu zilokhu zikhona.
