Umhlangano womanyano wamazwe omhlaba oweUnited Nations General Assembly, oqhutshelwa eNew York, eMelika usungulwe lamuhla okusemthethweni.
Inkokheli yamazwe angamalunga iqalile ukwethula amazwi ngendaba ezitshiyeneyo eziphatha umhlaba jikelele ikakhulu ubuyanga lezentuthuko. Abanye babakhokheli beAfrica abakhulume lamuhla nguMongameli Jakaya Kikwete owe Tanzania kanye loMongameli Ellen Johnson Sirleaf owe Liberia.
Bobabili bakhulume ngodaba lweZimbabwe kumibiko yabo, betshayela ihlombe inkokheli yeZanu PF ngokulobelana isivumelwano sokubumba uhulumende womanyano lamacele womabili eMDC.
Bobabili batshayele njalo ihlombe obenguMongameli weSouth Africa uMnu Thabo Mbeki ngokuqhuba inkulumo phakathi kwamabandla la. Baphinde bakhuthaza inkokheli yeMDC leZanu PF ukuthi isebenzelane ukulungisisa indubo ezibhekane lelizwe.
Limbiko iza ngesikhathi kulokhe kungakabi lokuvumelana phezu kodaba lokwabelana izikhundla phakathi kweZanu PF leMDC. Sokumelelwe uMongameli Mugabe, yena okhangelelwe ukukhuluma kusasa kumbe ngolweSine emhlanganweni weUnited Nations lo, ukuthi aphindele ekhaya aqalise inkulumo lenkokheli yeMDC.
Kusenjalo, inhlanganiso ekhankasela isisekelo sombuso esitsha elizweni iNational Constitutional Assembly (NCA) lamuhla yazise ukuthi ayisekeli okumunyetwe yisivumelwano seMDC leZanu PF mayelana lokulotshwa kwesisekelo esitsha.
I NCA yazise lokhu eHarare emhlanganweni lentathelizindaba lamuhla. UMnu Busani Ncube yisiphathamandla seNCA.
UNcube utshele uNtungamili Nkomo weStudio 7 ukuthi bayasisola kakhulu isivumelwano lesi ngoba sinikeza idale lephalamande umthwalo wokukhokhela ukulotshwa kwalesi sisekelo, pambi kukazulu.
