amalinks wokungena

Breaking News

Abesifazane bathi Bafuna Izikhundla Ezimqoka KuCabinet


Inhlanganiso ezikhankasela ukuqakathekiswa kwabesifazane kwezombusazwe zithi zifuna abesifazane banikezwe izikhundla eziyisilinganiso esingamatshumi amathathu ekhulwimni edaleni labaphathintambo, i Cabinet lona elilamalunga angamatshumi amathathu lanye, 31.

Zithi njalo izikhundla lezi kumele zibe yizikhundla ezilomnkantsho. Isivumelwano sokubumba uhulumende womanyano phakathi kweZanu PF leMDC sithi abesifazane kumele baqakathekiswe labo banikezwe izikhundla ngokulingeneyo labesilisa kuCabinet.

Laloba isivumelwano lesi singacaci ukuthi abesifazane kumele bathole ingatsha ezingaki, abesifazane bathi bayakuthakazelela ukuthi isivumelwano lesi siyabaqakathekisa.

UNkosikazi Cleopatra Ndlovu ngumqondisi wenhlanganiso elwela ilungelo labesifazane kwezombusazwe, i Women in Politics Support Network. UNkosikazi Ndlovu uthi abesifazane mabanganikezwa izikhundla kuphela, kodwa mabanikezwe izikhundla zokukhokhela ingatsha ezimqoka.

Amazwi akhe abuye agcizelelwe nguNkosazana Theresa Mugadza oyisiphathamandla senhlanganiso ye Feminists’ Political Education Project.

UMugadza uthi laloba ukukhethwa kukaNkosazana Nomalanga Khumalo oweMDC ekhokhelwa nguMnu Arthur Mutambara ukuba ngumsekeli kamlawuli wedale lephalamende kubajabulisile, babona abesifazane becindezelwa kunhlangothi ezitshiyeneyo.

Laye uthi kumele abesifazane bathole isilinganiso esingamatshumi amathathu kuhulumende omutsgha lo.

UMnu Abednico Bhebhe ngumeli weNkayi edaleni lephalamende, njalo ekuMDC ekhokhelwa nguMutambara. UBhebhe uthi laloba ebasekela abesifazane, kabancediseki ngoba bezondana bona bodwa njalo bengancedisani.

UBhebhe uthi abesifazane laba bayizitha zabo ngoba bedonselana phansi ngokunyeyana lokudingelana indaba zokweyisana lokungahloniphani endaweni yokuthi bancedisane bathuthuke kwezombusazwe.

Abesifazane kudale lephalamende okwamanje bangamatshumi amathathu lane, 34. Lelidale lona lilamalunga angu 210, okutsho ukuthi amalunga angu 176 ngabesilisa. Kudale leSenate khona abesifazane bangamatshumi amabili lantathu, 23. Idale leli lona lilamalunga angu 93. Behlangene kumadale womabili abesifazane laba bangamatshumi amahlanu lasikhombisa- 57 kuphela.

Ezinye Indaba ZeStudio 7...

​
XS
SM
MD
LG