Abakumaqula eZanu PF leMDC kunkulumo esezilethe uhulumende womanyano phakathi kwamabandla la babikwa betshone bekhuluma ecingweni mayelana ngodaba lokwabelana izikhundla ezimqoka.
Abazi ngokwenzakalayo bathi njalo abakumaqula la bebekhulumisana njalo lenkokheli yabo.
UMongameli Mugabe yena ubikwa etshone esemihlanganweni leziphathamandla zebandla lakhe ezigoqela uMnu Patrick Chinamasa kanye loMnu Emmerson Mnangagwa bekhuluma ngodaba lunye lwezikhundla.
UMugabe ubikwa njalo ebekhangelelwe
ukuhlangana loMnu Arthur Mutambara, umkhokheli welinye lamacele eMDC.
Esinye isiphathamandla ku Zanu PF esingathandanga ukuqanjwa ngegama sitshele iStudio 7 ukuthi ibandla laso selivumile ukuthi ugatsha lwezemali kudale le cabinet luthathwe libandla leMDC.
Kodwa isikhulumi seMDC ekhokhelwa nguMnu Morgan Tsvangirai, uMnu Nelson Chamisa ukulandule lokhu esithi kalalwazi ngakho. IMDC ka Tsvangirai ibimele ibe lomhlangano omkhulu owe National Executive lamuhla.
Injongo yalumhlangano ibingeyokuhlaziya udaba lokungavumelani phezu kodaba
lwezikhundla lolu. UChamisa uthi lumhlangano udluliselwe phambili, kodwa
kathandanga ukuveza ukuthi udluliselelweni phambili, lokuthi uzakwenziwa nini.
Ngakwelinye icele uChinamasa uveze lamuhla ukuthi iwofisi kaTsvangirai, yena ozakuba ngu Prime Minister kuhulumende womamnyano isikhona njalo im’melele.
Ingcwethi ecubungula ezombusazwe uMnu George Mkhwanazi uthi amazwi kaChinamasa la aveza ukuthi iZanu PF izimisele ukuthi uhulumende lo aphumelele laloba nje isala lengatsha ezimqoka.
