Ababalisi bafole ngolweSihlanu emadolobheni eHarare, koBulawayo, eMutare, eMasvingo le Gweru benanza ilanga le World Teachers’ Day, lona elingeNsonto.
Lokhu kwenzakala ababalisi bephakathi kokukhalala umsebenzi besithi bafuna iholo elifika ku us$1 200.
Umkhokheli wenhlanganiso ye Progressive Teachers Union of Zimbabwe, (PTUZ) eyiyo ebiqoqe lolu hlelo, uMnu. Takavafira Zhou uthi enye inhlanganiso yababalisi, iZIMTA layo ibaxhasile eHarare kulokhu kufola, okutshengisa ukuthi bonke ababalisi sebebonile ukuthi babhekane lohlupho olunzima elizweni.
Uthi loba uhlelo lwabo luqhubeke kuhle, amapholisa ake abahlupha kancinyane e Gweru edinga amaphetshana athile, andubana abavumela ukuthi bafole.Isiphathamandla se PTUZ ko Bulawayo, uMnu. Vusumuzi Mahlangu, uthi ixuku lababalisi eliphezu kwamakhulu amabili lifolile ezitaladini zako Bulawayo lihlabela kodwa amapholisa ayala ukuthi lihlabele ingoma ezihaya uhulumende.
