Ukukhulumisana phakathi kukaMongameli Mugabe labakhokheli bamacele womabili eMDC uMnu Morgan Tsvangirai loMnu Arthur Mutambara, okuqale izolo eHarare ngodaba lokwabelana izikhundla zedale lecabinet kuqhubekele phambili lamuhla, kwaphela kungela kuvumelana.
Ephuma emhlanganweni wangolweSithathu ntambama, uTsvangirai utshele intatheli ukuthi lokhu kungalaku vumelana. Unobhala jikelele webandla lakhe uMnu tendai Biti yena uthe bakhulekela ukuthi mhlawumbe kungaba lokuvumelana kusasa kubunjwe uhulumende womanyano.
Udaba lokwabelana izikhundla ezimqoka ezifana logatsha lwezemali kanye lolwendaba zaphakathi kwelizwe lubikwa lulokhu luhlupha, uMugabe esithi ibandla lakhe yilo elilolwazi olujulileyo lokuqhuba umsebenzi phansi kwengatsha lezi.
Ngakwelinye icele, uTsvangirai loMutambara labo babikwa besithi ngitsho, akumelanga kubenjalo, uMugabe kumele enikeze iMDC lezi ngatsha. Engena emhlanganweni walamuhla uMutambara utshele intatheli ukuthi ukudonselana okwenzakalayo yibuwula nje.
UMnu Thabo Mbeki, umlamulankunzi kudaba lweZimbabwe nguye okhokhela inkulumo lezi.
Ingcwethi ecubungula ezombusazwe uMnu Mandlenkosi Gatsheni uthi amabandla la akhangelele ukuthi engathola ingatsha ezimqoka lezi azisebenzise ekulungiseleleni ukhetho oluzakwenziwa ekupheleni kwempilo kahulumende womanyano lo, yikho nje edonselana.
