amalinks wokungena

Breaking News

Umhlangano WeSadc Phezu KweZimbabwe Awusabanga Khona


Umhlangano weSadc Troika obumele ubekhona eSwaziland lamuhla ngenjongo yokuxazulula umbango wezikhundla phakathi kweZanu PF leMDC, awusabanga khona ngoba umkhokheli welinye lamacele eMDC uMnu Morgan Tsvangirai engayanga kulumhlangano.

ISikhulumi sikaTsvangirai uMnu George Sibotshiwe utshele iStudio 7 ukuthi uTsvangirai wehlulekile ukuya eSwaziland ngoba engela passport. Uthi uhulumende uyala ukunikeza uTsvangirai i passport entsha ngemva kokuba ekade elayi isigcwele.

UTsvangirai unikezwe i Emergence Travel Document (ETD) izolo eyokuthi aye eSwailand, kodwa wathi kasoze aye kulumhlangano engela passport ngokwayo. UTsvangirai usekelwe nguMnu Arthur Mutambara ekwenzeni kwakhe.

UMutambara utshele iStudio 7 ukuthi umhlangano lo ucitshiwe ngoba uTsvangirai engekho, esithi ibandla lakhe lifuna uTsvangirai anikwe i passport yakhe ngokuphangisa.

Inkosi yeSwaziland uMswati uke wazinikela ukuthumela indizamtshina ukuthi iyethatha uTsvangirai imlethe kulumhlangano kodwa wayala uTsvangirai esithi ufuna i passport yakhe kuqala.

UMutambara loMugabe bebehambile eSwaziland. Isiphathamandla seMDC kaTsvangirai uMnu Sam Sipepa Nkomo usichasisele okunengi ngokungayi kukaTsvangirai kulumhlangano esithi andubana anikezwe ipassport yakhe uTsvangirai kasoze aye ndawo le ETD alayo.

Igcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi ukungabi khona komhlangano walamuhla kuveza sobala ukuthi uhulumende womanyano phakathi kweZanu PF leMDC lo ulobunzima phakathi.

Ezinye Indaba ZeStudio 7...

XS
SM
MD
LG