Umhlangano weSadc Troika owokuhlaziya udaba lokwabelana izikhundla phakathi kweZanu PF leMDC, wona ongasabanga khona izolo kwele Swaziland usuzakwenzelwa eHarare mhlaka 27 ngoMvulo ngeviki ezayo.
Umhlangano wayizolo ube liphutha ngoba umkhokheli welinye lamacele eMDC uMnu Morgan Tsvangirai engayanga eSwaziland esithi ufuna uhulumende amnikeze ipassport yakhe, hatshi i Emmergency Travel Document (ETD).
Ngalokhu iSadc yazise ukuthi lumhlangano suzaqhutshelwa eHarare ngoMvulo. Kodwa isikhulumi seMDC kaTsvangirai uMnu Nelson Chamisa uveze ukuthi umhlangano lo ungaba liphutha njalo nxa uhulumende weZanu PF engaqhubeka etshengisa ubuqholo lokuswela inhlonipho kubandla lakhe lenkokheli yalo.
Uthi uTsvangirai kumele anikezwe ipassport yakhe ngokuphangisa. Isikhulumi sikaMongameli Robert Mugabe uMnu George Charamba yena uthi isizatho sokwehluleka kukahulumende ukunikeza uTsvangirai i passport yikuthi iphepha elisetshenziswa ekudindeni ama passports liyasilela elizweni.
Uthi lokhu ngumthelela wezijeziso zenotho ezethulelwe uhulumende weZanu PF, zona athi zikhankaselwe nguTsvangirai ngokwakhe lebandla lakhe.
Umsekeli wesikhulumi seMDC ekhokhelwa nguMnu Arthur Mutambara uMnu Renson Gasela utshele uNtungamili Nkomo weStudio 7 ukuthi njengoba uhulumende weZanu PF evuma ukuthi seyehlulekile ukuqhuba umsebenzi ngemfanelo kugatsha lweHome Affairs, okuyilo olubona ngokudindwa kwama passports, kavume phela ukulunikeza iMDC kaTsvangirai.
Kunjalo nje, ingcwethi ecubungula ezombusazwe uMnu George Mkhwanazi uthi laloba umhlangano wokuhlaziya ukudonselana phakathi kweMDC leZanu PF lo usudluliselwe phambili, kaboni iSadc isenelisa ukuluxazulula nje kaula udaba lwezikhundla lolu.
