Laloba bekuke kwaba lembiko yokuthi uMnu Morgan Tsvangirai ulakho ukungayi emhlanganweni weSadc Troika ozaqhutshelwa eHarare ngoMvulo phezu kodaba lokwabiwa kwezikhundla phakathi kweZanu PF leMDC, isikhulumi salelibandla, uMnu Nelson Chamisa utshele iStudio 7 ukuthi uTsvangirai uzaphatheka kulumhlangano.
Ibandla leli belisithi ukungaphiwa ipassport kukaTsvangirai
kungabangela ukuthi uTsvangirai engayi kumhlangano lo.
Yena uTsvangirai lamuhla ube lomhlangano labameli bezigodlo zamazwe ezwekazi leAfrica eHarare wabazisa ngokuthi inkulumo phakathi kwebandla lakhe leZanu PF sezingaphi. UMnu Tsvangirai ubikwa etshele abameli laba ukuthi umbango wezikhundla uqhubekela phambili nje ngoba ibanda leZanu PF lisala lengatsha ezimqoka zedale lecabinet.
Uveze njalo ukuthi ibandla lakhe selilobele uMnu Thabo Mbeki incwadi likhonona
ngendlela aphatha ngayo udaba lwezikhundla njengomlamulankunzi.
Abazi
ngokwenzakalayo kudaba lolu bathi iMDC kaTsvangirai ibikhonona ngogwalo
lukaMbeki olusezandleni zeStudio 7 abikwa ebezalwethulela umhlangano weSadc Troika eSwaziland ngoMvulo.
Ugwalo lolu luveza ukuthi iZanu PF seyavuma ukuthi
ugatsha lwezemali luye kuMDC. Luthi njalo amabandla womabili azakuba lesabelo
kugatsha lwe Home Affairs. Kodwa iMDC ithi lokhu kulokudonselana phezu kogatsha
lolu, kanye lezinye ingatsha ezinengi, yikho nje isola kakhulu ugwalo umbeki
ayemele alwethulele inkokheli yeSadc Troika lolu.
Ingcwethi kwezombusazwe uMnu Mandlenkosi Gatsheni utshele iStudio 7 ukuthi kungehlula ukuthi amabandla la avumelane ngoMvumo, iMDC ilakho ukuthi ifuna imbeki asuswe ukuba ngumlamulankunzi yikho ukuthi iqhubeke ikulezi nkulumo.