amalinks wokungena

Breaking News

Umhlaba Jikelele Wamukela Ukukhethwa Kuka Obama


UMnu Barack Obama nguye osenguMongameli weMelika omutsha! UMnu Obama, yena olilunga lebandla lama Democrats unqobe uMnu John Mccain obemela ibandla lama Republicans kukhetho lukaMongameli olwenziwe ngolweSibili.

UMnu Obama uzaqala umsebenzi ngoZibandlela ngoba uMongameli George Bush uyabe eseqhiba owake umsebenzi. UObama uba ngonsundu wakuqala embalini yeMelika ukukhokhela lelilizwe.

Ukukhethwa kwakhe yinto ejatshulelwe ngumhlaba jikelele, ikakhulu amazwe ezwekazi le Africa. Kwele Kenya, lapho okudabuka khona uyise, uMongameli walelo lizwe unqume ukuthi ngolweSine likhefu lokuthakazelela ukukhethwa kuka Obama.

Owake wakhokhela eleSouth Africa, uMnu Nelson Mandela lomfundisi odume kakhulu welizwe lakhe uBishop Desmond Tutu ngabanye babantu abahloniphekayo abathumele uObama incwadi bemenzela amhlophe ngokunqoba kwakhe.

Umeli weMelika eZimbabwe, uMnu James Mcgee, yena laye ongonsundu utshele intatheli eHarare ngolweSithathu ukuthi uyajabula ngesehlakalo lesi, esithi ufisa ukuthi uzibuse okhululekileyo okhona eMelika abonakale kweleZimbabwe.

EleRussia lele Britain athi akhangelele ukusebenzelana kuhle loObama. UMnu Bush yena umtshayele ihlombe. Amacele womabili eMDC athi alokujabula okukhulu ngendlela ukhetho lweMelika oluqhutshwe ngayo, lisithi ngabe lokhu kuyenzakala kwele Zimbabwe.

Umsekeli kanobhala jikelele wecele leMDC elikhokhelwa nguMnu Arthur Mutambara uNkosikazi Priscillar Misihairambwi-Mushonga utshele uNtungamili Nkomo oweStudio 7 ukuthi bamtshayela ihlombe oka Obama.

UNtungamili Nkomo weStudio 7 uphinde waxoxa loMnu Felix Magalela Mafa, oyisikhulumi secele leMDC elikhokhelwa nguMnu Morgan Tsvangirai koBulawayo othi izwekazi leAfrica lona athi ligcwele ontando kayiphikiswa kumele lifunde ukuthi impumela yokhetho iyahlonitshwa njengokwenzakale eMelika.

Kunjalo, nje umbuzo abantu abanengi izitha kanye labalobudlelwano obuhle leMelika abangabe sebezibuza wona ngothi; kambe uObama uzaletha inguquko na kundlela iMelika edlelana layo lamanye amazwe.

Lumbuzo ubuzwe ingcwethi ecubungula ezombusazwe uMnu Last Moyo, nguNtungamili Nkomo egxila kakhulu kudaba lobudlelwano phakathi kweZimbabwe leMelika. UMoyo uthe akaboni ubudlelwano bamazwe la buguquka nje kalula.

Ezinye Indaba ZeStudio 7...

‚Äč
XS
SM
MD
LG