UMongameli Robert Mugabe labakhokheli bamacele womabili eMDC uMnu Morgan Tsvangirai loMnu Arthur Mutambara bakhangelelwe ukulubhekisa kweleSouth Africa kusasa belanda umhlangano weSadc ozahlaziya udaba lweZimbabwe ngeSonto eJohannesburg.
Umkhokheli weANC, uMnu Jacob Zuma umkhokheli weANC uphinde wagcizelela inkhuthazo yakhe yokuthi inkokheli yeSadc kumele ibambe ngamandla inkokheli yeMDC leyeZanu PF ukuthi ivumelane phezu kodaba lokwabelana izikhundla zedale lecabinet kubunjwe uhulumende womanyano.
Laloba iMDC isithi kulengatsha ezilitshumi amabandla la alokhu engakavumelani ngazo, ugatsha olubona ngendaba zaphakathi kwelizwe yilo olumqoka olulokhu luhlupha. IZanu PF ibikwa iqina ngokuthi icele leMDC elikhokhelwa nguMnu Morgan Tsvangirai liphakathi kokufundisa abasekeli balo imisebenzi yobuhlamuki lobulwecatsha emazweni afana leBotswana.
Lokhu yinto uMongameli Mugabe ayitshele umhlangano weSadc Troika obekhona eHarare kunsukwana ezisanda kwedlula, esithi ngalokhu ngeke avume ukuthi ugatsha lolu luye kuMDC. Kodwa isikhulumi seMDC ekhokhelwa nguTsvangirai uMnu Nelson Chamisa ukulandule lokhu.
Uthi iZanu PF yiyo eqhuba imisebenzi yobudlova hatshi iMDC. Inkokheli yeSadc layo iphakathi kokulungiselela lumhlangano. Kodwa uMongameli weBotswana uIan Khama kasoze abe khona. Isiphathamandla seMDC njalo engumeli weInsiza South edaleni lephalamende uMnu Siyabonga Malandu Ncube ugcizelele amazwi kaChamisa, ekulandula ukuthi iMDC ifundisa amasekeli bayo imisebenzi yobuhlamuki.
Kunjalo nje, ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi yinto nje ejwayelekileyo ukuthi iZanu PF yethese labo ephikisana labo umlandu wobuthororo, laloba kungelabufakazi balokho.
