Inkokheli yomanyano weSadc yehlulekile izolo ukulungisisa udaba lweZimbabwe emhlanganweni wayo oqhutshelwe kweleSouth Africa.
Linkokheli ikhuthaze ekupheleni komhlangano wayo ukuthi kubunjwe uhulumende womanyano ngokuphangisa eZimbabwe, isithi njalo icele leMDC elikhokhelwa nguMnu Morgan Tsvangirai leZanu PF kumele ekhethe ilunga linye ngabandla abe ngomphathintambo bpgatsha lwendaba zaphakathi kwelizwe.
Lokhu kutsho ukuthi iSadc ifuna kube labaphathintambo ababili bogatsha lwendaba zaphakathi kwelizwe, iHome Affairs. Icele likaTsvangirai lazise ukuthi kalivumelani lesinqumo seSadc lesi, esithi ufuna ibandla lakhe likhokhele ugatsha lolu lilodwa.
Icele elikhoklhelwa nguMnu Arthur Mutambara lona lithi lalo lisekela uMnu Tsvangirai ekuthini ugatsha lweHome Affairs luye kubandla lakhe. Kodwa umsekeli kamphathintambo obona ngokwethulwa kwemibiko uMnu Bright Matonga utshele uNtungamili Nkomo weStudio 7 ukuthi ibandla leZanu PF liyasithakazelela isinqumo seSadc.
UMongameli Mugabe ngokwakhe, uthi uzabumba uhulumende kunsukwana ezilandelayo, esithi kudingeka ukuthi amacele womabili eMDC amnikeze amabizo alabo afuna bebe ngabaphathintambo kuhulumende womanyano.
Uzulu weZimbabwe yena seveze ukudana okukhulu ngokwehluleka kweSadc ukulungisisa udaba lweZimbabwe esithi lokhu kutsho ukuthi udubo olukhona elizweni luzaqhubekela phambili, kubika intatheli yethu uMark Peter Nthambe eseHarare.
UBenedict Nhlapho yena ubika ukuthi izizalwane zeZimbabwe ezihlala kweleSouth Africa lazo zidane kakhulu. Ingcwethi ecubungula ezombusazwe, uMnu George Mkhwanazi utshele uNtungamili Nkomo isinqumo seSadc siveza sobala ukuthi lumanyano usekela uMongameli Mugabe.
