Odokotela be Zimbabwe bemanyane labe Physicians for Human Rights (PHR)bakhuthaza umanyano we United Nations ukuthi uncedise eleZimbabwe ngoba kungenzeka inkeme-nkeme yendaba, abantu belahlekelwe yimphefumulo ngobunengi babo ngenxa yokucuba kwenhlelo zempilakahle elizweni.
Lokhu kulandela ukwehluleka kukahulumende ukuqhuba kuhle inhlelo zokunika amaphilisi abantu abalemikhuhlane etshiyeneyo, egoqela ingculaza, malaria kanye lokuswelakala kokudla. Emhlanganweni owenziwe yilaba odokotela bebanengi ngasikhathi sinye ecingweni –i teleconference lamuhla lentahthelizindaba emhlabeni jikelele, udokotela Douglas Gwatidzo, umgcinisihlalo wenhlanganiso ye Zimbabwe Association of Doctors for Human Rights (ZADHR), uchasise ngomumo okhona manje ongamuhle ngitsho lakancane.
Kusenjalo, umkhuhlane wesihudo, i cholera, osubulele abantu eHarare kanye le Beitbridge, ubikwa lokhu umemetheka njalo ususabala kwezinye indawo zelizwe.
Umphathintambo wezempilakahle, uDokotela David Parirenyatwa, ubikwa ebhoda-bode edolobheni le Beitbridge ngolweSithathu, ehlolisisa umumo lo njalo wathembisa ukuthi uhulumende wenza okusemandleni akhe ukuthi umkhuhlane lo ungasabalali.
UMnumzana Thaba Patrick Moyo, u Mayor wedolobho lako Bulawayo, lapho okungakazwakali ukuthi umkhuhlane lo ungabe usuqhamukile, utshele uSithandekile Mhlanga owe Studio 7 ukuthi ikhansili ifundisa uzulu wakuleli dolobho okufanele akwenze ukuze azivikele loba nje lokhu kuzaba ngumthwalo onzima ngokusilela kwamanzi, ukungabuthwa kwezibi, ukuduba kwezititshi ze sewage lokunye.
