Iwofisi yegqwetha elikhulu likahulumende isiqedile ukuloba ugwalo olucanda indlela yokuguqulwa kwesisekelo sombuso oluka Ammendment # 19, njalo lolugwalo lubikwa solusezandleni zamacele womabili eMDC leZanu PF.
Umlamulankunzi edabeni lweZimbabwe, uMnumzana Thabo Mbeki, owayengumongameli weSouth Africa, wamukele ugwalo lolu ensukwini ezimbalwa ezedluleyo luvela ewofisini yeggwetha elikhulu likahulumende, waluhlaziya waseluthumela esigodlweni someli weSouth Africa eZimbabwe, eHarare ngolweSibili lapho amabandla la obe kumele ayeluthatha.
Icele leMDC elikhokhelwa nguMnu Arthur Mutambara liyakuvuma ukuthi solusezandleni zalo lolugwalo. AbeZanu PF labo bathi balutholile.
Kodwa abe MDC ekhokhelwa nguMnumzana Morgan Tsvangirai bathi kabakaluthathi lolugwalo, besithi njalo laloba bengaze babe lalo kabalunanzi ngoba bengazange banikezwe ithuba lokuthi labo baphe imibono yabo lezifiso zabo ukuthi ziqukethwe yilo.
Abamela iZanu PF leMDC kunkulumo zokubumba uhulumende womanyano, bebemele baye kweleSouth Africa ngolweSithathu ukuyahlaziya ugwalo lokuguqulwa lwesisekelo lolu, kodwa icele likaTsvangirai libikwa lithe lona abameli balo kabakho elizweni ngalokhu bebengasoze benelise ukuphatheka kulumhlangano.
Ngakho, ke lumhlangano ubikwa usuzakwenziwa ngeviki ezayo. Kodwa isikhulumi seMDC kaTsvangirai uMnu Nelson Chamisa utshele iStudio 7 ukuthi kabalalwazi ngomhlangano lo, esithi njalo ibandla lakhe liphakathi kokuloba olwabo ugwalo lokuguqulwa kwesisekelo sombuso abazalusa kuMbeki.
Uthi njalo bafuna ugwalo lolu luphathe udaba lokwabiwa kwezikhundla zedale lecabinet ngokulinganayo. Kodwa unobhala jikelele weMDC ekhokhelwa nguMutambara uMnu Welshman Ncube uthi lokho kakungeni kundaba zokugukulwa kwesisekelo.
Ngakwelinye icele, ingcwethi ecubungula ezombusazwe uMnumzana George Mkhwanazi utshele uNtungamili Nkomo weStudio 7 ukuthi ibandla leMDC kumele lime ngezifiso zalo u Ammandment # 19 engakaze abe ngumthetho.
