Iziphathamandla zamaqula amabandla athi amacele womabili eMDC leleZanu PF kunkulumo zokubumba uhulumende womanyano zivumelene lamuhla kwele South Africa phezu kogwalo lokuguqulwa kwesisekelo sombuso, u Ammendment # 19 zaloba amagama kuleso sivumelwano.
Lokhu kutsho ukuthi
ukuguqulwa kwesisekelo lokhu sokuzaziswa uzulu okusemthethweni egwalweni
lukahulumende olwe Government Gazette kunsukwana ezimbalwa. Lusuka lapho luzakuyakwethulelwa idale lephalamende amalunga aleli dale aluhlaziye andubana avumelane ukuzwe wethulwe ube ngumthetho.
U Ammendment # 19 uphendla ukubunjwa kwesikhundla senhloko kahulumende, uPrime Minister, abasekeli bakhe ababili kanye lamalunga athoba munwe munye awedale
leSenate.
Laloba icele leMDC elikhokhelwa nguMnu Tsvangirai lilobe igama kulesi sivumelwano libikwa lisithi amalunga alo edale lephalamende kasoze avotele ukwethulwa kuka Ammendment # 19 nxa izikhalazo zalo zonke zingalungisiswanga.
Izikhalazo lezi zigoqela udaba lokuthi iMDC ifuna ukukhokhela ugatsha lwendaba zaphakathi kwelizwe. UMnu Mandlenkosi Gatsheni yingcwethi ecubungula ezombusazwe.
UGatsheni uthi laloba amabandla la sevumelene phezu kokuguqulwa kwesisekelo sombuso, kusese lobunzima phambili ngoba izikhalazo zikaTsvangirai zilokhu zingalungisiswanga.
