Umqondisi wenhlanganiso ekhankasela ukulondolozwa kokuthula elizweni njalo ihluzisisa ngezehlakalo zokuhlukuluzwa kwabantu, iZimbabwe Peace Project, uNkosazana Jestina Mukoko othunjwe emzini wakhe ngolweSithathu emadabukakusa lokhu engakabonakali.
Amagqwetha alwela ilungelo likazulu athi amdinge enkambeni phose ilizwe lonke
kodwa kabamtholanga. Inhlanganiso zomhlaba jikelele zitshengise ukudana
ngesehlakalo lesi esenzakale ilizwe likhangelele ukubuswa nguhulumende
womanyano.
Omela eleMelika eZimbabwe uMnumzana James Macgee uthe kumele uhulumende amveze uMukoko ngokushesha. Ekhuluma lentathelizindaba eHarare ngolweSine umgcinisihlalo wenhlanganiso KaMukoko, eyeZPP, uMnumzana Alois Chaumba uthe kumele uhulumende aveze uMukoko masinyane, kumbe athume amapholisa ukuthi ilizwe lonke nxa eqinisile ukuthi akakakwazi ukuthi uthunjwe ngubani.
Umqondisi wenhlanganiso yeCrisis in Zimbabwe Coalition, eyiyo eqoqe lumhlangano uMnu. Xolani zitha utshele uChris Gande weStudio 7 ukuthi abalwela ilungelo likazulu baphakathi kokwesaba langokwethuswa yisehlakalo lesi kodwa bazaqhubeka beveza ububi bukahulumende aze amveze uMukoko.
