Ukufa kukamnumzana Elliot Manyika obengu National Political Commissar webandla leZanu PF izolo engozini yemota sokutshiye abanengi belemibuza engelampendulo ngendlela afe ngayo. UManyika ubelubhekise eGwanda evela eMutare ukuyaqoqa inkokheli yebandla leZanu PF yezabelo.
UManyika ubehamba lomtshayeli wakhe lapho imota akade behamba ngayo, eyohlobo lweMercedes Benz idubuke ivili yabhewuka emgwaqweni weZvishavane- Mbalabala. UManyika uphethe izikhundla ezimbalwa kubandla leZanu PF lakuhulumende ezigoqela ukuba ngu Provincial Secretary for Administration ngo 1986, under secretary kugatsha lwezangaphandle kwelizwe ngo 1990, njalo wake waba ngumphathintambo wogatsha lwezabatsha.
Lesisikhundla wasithatha ngemva kokusuka kiso kukaMnumzana Border Gezi laye owafela engozini yemota. UManyika ubengumuntu obesesatshwa kakhulu esigabeni seMashonaland Central kubikwa ukuthi ubangele udlakela owesabekayo kubasekeli beMDC, abacatshiswayo abanye babulawa. Akukaziwa ukuthi uManyika uzangcwatshwa nini njalo ngaphi.
Ubrend Moyo weStudio7 ukhulume lengcwethi ecubungula ezombusazwe uMnumzana Gorden Moyo ongumqondisi weBulawayo Agenda, othi laloba kunzima esintwini ukuthi abantu bajabulele ukufa komuntu, balutshwane kakhulu abadaniswe yikufa kukamanyika.
