Abalwela ukulondolozwa kwelungelo loluntu bathi ukuthunjwa lokuhlukuluzwa kwabantu elizweni, akusiyo nto entsha ngoba uMongameli Mugabe eqhubekela phambili ngomkhuba wobudlova awuqala kudala abantu bengananzeleli esephula ilungelo loluluntu ngendlela ezehlukeneyo, okugoqela impi yeGukurahundi lapho abulala khona inkulungwane lenkulungwane zabantu beMandebeleni.
EleZimbabwe limanyene lamazwe omhlaba ngolweSithathu ekunanzeni ilanga leHuman Rights Day kulokudana okukhulu ngokokuthunjwa kwabantu kumalanga asanda kwedlula abakugoqela uNkosazana Jestina Mukoko labanye, ngabantu abacatshangelwa ukuthi zinsoli zikahulumende kaMugabe.
Ukuhlaziya loludaba sixhume igqwetha elilwela ukulondolozwa kwelungelo loluntu uNkosazana Anah Moyo lengcwethi ecubungula ezombusazwe uMnu Brilliant Mhlanga. Bobabili bathi uhulumende weZimbabwe kumele etshiyane lobudlova enanze ilungelo loluntu.
