Amagqwetha amela uNkosazana Jestina Mukoko umqondisi weZimbabwe Peace Project-ZPP othunjwe ngabantu abangaziwayo mhlaka 3 December lezinye izisebenzi ezimbili zalinhlanganiso uMnumzana Pascal Gonzo loMnumzana Broderick Takawira, athi kuzekubenamhla awakatholi ulwazi lokuthi bangabe bengaphi. UGonzo loTakawira bathunjwe ngoMvulo odluleyo emahofisini e ZPP.
Ngomvulo kuthunjwe njalo uMnumzana Ghandi Mudzingwa oweMDC ekhokhelwa nguMnumzana Morgan Tsvangirai, loMnumzana Zacharia Nkomo umnewabo ka Harrison Nkomo elinye lamagqwetha kaNkosazana Mukoko. Bonke laba akwaziwa ukuthi bangaphi laloba namhla kukekwaphuma imibiko emaphephandabeni ebulenjini ukuthi uMukoko loMudzingwa labanye ababili bengabe begcinwe kweyinye indawo efihlekileyo eKariba.
UMnumzana Harrison Nkomo elinye lamagqwetha ka mukoko uthe imibiko le ngamanga wagcizelela ukuthi sebedinge badinga abathunjiweyo laba kodwa abakatholi ladletshana lokuthi bangaphi. IStudio 7 ithole ulwazi lokuthi amagqwetha amele uMukoko labanye kanye lenkokheli yenhlanganiso ezilwela ilungelo loluntu ezimbalwa ayethuselwa ngabantu abangaziwayo, belandelwa lokuthathwa imfanekiso.
Lumsakazo wamukele njalo umbiko wokuthi izisebenzi zenhlanganiso kaMukoko eye ZPP phose zonke ziphakathi kokucatsha endaweni ezehlukeneyo zisesabela impilo yazo.UBrenda Moyo ukhulume legqwetha elilwela ilungelo loluntu uNkosazana Anna Moyo othi ukwethuselwa kwamagqwetha ka Mukoko lokhu kuzakwenza umsebenzi wokudinga abathunjiweyo laba ubenzima kakhulu.
