UMongameli Mugabe ubikwa sevimbe umanyano weUnited Nations ukuthi uthumele isikhonzi sawo eZimbabwe ukuthi siyehlaziya ngendubo uzulu abhekane lazo.
Ekhuluma lentatheli ngolweSithathu, unobhala jikelele walumanyano, uMnu Ban ki-Moon uveze ukuthi uke wakhulumisana loMugabe ngenyanga edluleyo bavumelana ukuthi athumele uMnu Haile Menkerios eZimbabwe.
Kodwa uBan uthi uhulumende sesala ukuthi uMenkerios angene elizweni. Uthi injongo yokuthumela isikhonzi lesi yikuthi iUN izibonele okwenzakala elizweni, ukuze yazi ukuthi ingancedisa njani ilizwe ukulwisana lendubo ezikhona ezifana lendlala lomkhuhlane wecholera.
Isiphathamandla seZanu PF uMnu Chris Mtsvangwa utshele iStudio 7 ukuthi uMenkerios bamvimbile ngoba befuna ukuthi baqale babumbe uhulumende womanyano. Uthi kungenzeka lokhu, bazamvumela ukuthi angene elizweni.
Kodwa ingcwethi ecubungula ezombusazwe uMnu Rejoyce Ngwenya utshele uNtungamili Nkomo weStudio 7 ukuthi isizatho esimqoka sokuvinjwa kukaMenkerios yikuthi uhulumende wesaba ukuthi uzathola bonke ubufakazi bokwephulwa kwelungelo loluntu lokuhlukuluzwa kukazulu nguhulumende kaMongameli Mugabe.
