Umkhokheli welinye lamacele eMDC, uMnu Morgan Tsvangirai usexwayise uhulumende ukuthi akhulule bonke abantu abathunjiweyo ngokuphangisa, esithi nxa kungenzakalanga lokhu kusiyafika mhlaka 1 ngoZibandlela, ibandla lakhe lizaphuma kunkulumo zokubumba uhulumende womanyano leZanu PF.
Ekhuluma emhlanganweni lentathelizindaba eseBotswana ngolweSihlanu, uMnu Tsvangirai uxwayise njalo ukuthi bonke abathunjiweyo kumele bamiswe phambi komthethwandaba ngokuphangisa nxa belamacala abetheswayo.
UTsvangirai usole uhulumende kaMongameli Mugabe esithi nguye oqhuba imisebenzi yobudlova, ethumba abasekeli bebandla lakhe kanye labantu abalwela ilungelo loluntu elizweni. Ugcizelele wathi nxa okohulumende womanyano kusehlula kumele kwenziwe ukhetho lokudinga uMongameli olukhululekileyo.
UMnu Tsvangirai ukhuthaze njalo umanyano weSadc ukuthi usebenzelane ndawonye leAfrican Union kulungisiswe udaba lweZimbabwe ngokuphangisa.
Ingcwethi ecubungula ezombusazwe, uMnu Immanuel Hlabangana utshele uNtungamili Nkomo weStudio 7 ukuthi engaphuma kulezi nkulumo uTsvangirai, bambalwa abangamsola ngoba sokusobala kuzulu jikelele ukuthi iZanu PF kayizinikelanga kuhulumende womanyano.
