Umkhokheli webandla elibusayo kweleSouth Africa uMnu Jacob Zuma usekhuthaze abeZanu PF labe MDC ukuthi balungisise udaba lweZimbabwe ngokuphangisa.
Embikweni awethule ngolweSithathu, uZuma uthe ulethemba lokuthi umnyaka omutsha uzaletha inguquko eZimbabwe.
Ngakwelinye icele umfundisi olodumo uBishop Desmond Tutu usole kakhulu inkokheli yeSouth Africa esithi isekela umbuso omubi kaMongameli Mugabe.
Ekhuluma emsakazweni weBBC laye ngolweSithathu, uTutu ukhuthaze inkokheli yaleli lizwe ukuthi
lithathele uMongameli Mugabe amanyathelo aqinileyo okumususa embusweni.
Umongameli Mugabe
ngokwakhe uthi kasoze asuswe embusweni yiloba ngubani, ikakhulu abakwamanye amazwe ngoba esithi ilizwe
leZimbabwe ngelakhe. Uthi abantu beZimbabwe yibo bodwa abangamsusa embusweni kukhetho.
Ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi uvumelana loMnu Tutu ekuthini ngabe eleSouth Africa lisebenzisa amandla elilawo, ngabe uMugabe sowaguqula izenzo.
