Umkhokheli wenhlanganiso ye Zimbabwe Peace Project, uNkosazana Jestina Mukoko lamalunga ecele leMDC angamatshumi amabili lamuhla bebesemethethwandaba laho ababikwa bebebotshwe ngamaketane enyaweni lezandleni.
Abantu laba bebesemthethwandaba kamantshi lapho abaphikisa ukwalelwa ithuba lokuhlawula imali yesibambiso. Abantu laba bathunjwa kumaviki kumbe inyanga ezedluleyo bengaziwa ukuthi bangaphi kuze kube iviki edluleyo. Kuthi ngakwelinye icele uhulumende laye use emthethwandaba weHigh Court udabala lokuthi abantu laba kumele bancitshwe ithuba lokuthoniswa bevela ngekhaya.
UMukoko labasekeli bemdc laba betheswa icala lokufuna ukugengqula uhulumende okungekho emthethweni. Ngesikhathi sisiya emoyeni umahluli uMnu. Mishrod Guvamombe, amagqwethakahulumende kunye lamagqwetha amela izibotshwa bebephakathi kokuhlaziya udaba lokuthi bakhululwe kumbe hatshi lababantu.
UChris Gande weStudio 7 uxoxe lengcwethi ecubungula ezombusazwe, uMnu. Bekithemba Mhlanga othi kukhanya uhulumende efuna ukusebenzisa izibotshwa lezi njengendlela yokukhuthaza umongameli welinye lamacele eMDC, uMnu. Morgan Tsvangirai ukuthi angene kunkulumo zokubumba uhulumende womanyano.
