EleSouth Africa, lona elingumgcinisihlalo weSadc seligcizelele inkuthazo yalo yokuthi kubunjwe uhulumende womanyano ngokuphangisa eZimbabwe kungelani lokuthi izikhalazo zeMDC zilungisisiwe kumbe hatshi.
Isikhulumeli sikaMongameli weSouth Africa, uMnu Thabo Masebe wethule amazwi ngoMvulo esithi iSadc ifuna luhulumende abunjwe ngokuphangisa aqalise ukulwisana lobunzima uzulu abhekane labo.
UMnu Masebe uthi uMongameli Robert Mugabe kumele afungise uMnu Morgan Tsvangirai athathe isikhundla sakhe sokuba yinhloko kahulumende kanye labasekeli bakhe ababili ukuze uhulumende lo aqalise ukusebenza.
Icele leMDC elikhokhelwa nguMnu Tsvangirai lithi kalisoze lingene
kuhulumende lo izikhalazo zalo zingalungisiswanga zonke. Kodwa isiphathamandla
seZanu PF, uMnu Joram Gumbo uthi uhulumende womanyano kumele abunjwe kungelani lokuthi iMDC iyaphatheka kumbe hatshi.
Ngakwelinye icele, ingcwethi ecubungula ezombusazwe uMnu Rejoyce Ngwenya utshele uNtungamili Nkomo weStudio 7 ukuthi ibandla leMDC akumelanga lingene kuhulumende lo izikhalazo zayo zonke zingalungisiswanga.
