Kulandela ukuvezwa lokumiswa emthethwandaba kwabantu ekade bethunjiwe - abagoqela abasekeli beMDC – icele leMDC elikhokhelwa nguMnu Morgan Tsvangirai libikwa lilakho ukuqhubeka liphakathi kwenkulumo zokubumba uhulumende womanyano leZanu PF.
UMnu Tsvangirai wethule umbiko ngeviki edluleyo esithi kungafika umhlaka 1 Zibandlela abantu laba belokhu bengakavezwa, icele lakhe lizaphuma kunkulumo lezi. Kodwa, phose bonke abantu laba, sebesiwe emthethwandaba.
Laloba isikhulumi sikaTsvangirai, uMnu George Sibotshiwe esithi icele lakhe lilokhu lisima ngenkulumo yalo yokuphuma kulezi nkulumo, isiphathamandla saleli bandla uMnu Sam Sipepa Nkomo utshele uNtungamili Nkomo weStudio 7 ukuthi balakho ukungaphumi kunkulumo lezi.
Ngakolunye uhlangothi, icele le MDC elikhokhelwa nguMnu Arthur Mutambara ligcizelele ukuthi kufanele kubunjwe uhulumende womanyano ngokuphangisa ukuze kuqedwe ukuhlupheka kwabantu okuselizweni.
Unobhala jikelele waleli cele uMnu Welshman Ncube, utshele uSithandekile Mhlanga weStudio 7 ukuthi ulethemba lokuthi njengoba uMnu Tsvangirai esezuzile ipassport yakhe, uzaphindela ekhaya kubunjwe uhulumende womanyano ngokuphangisa.
Kusenjalo, ingcwethi ecubungula ezombusazwe uMnu Brilliant Mhlanga uthi uMnu Tsvangirai kaselaso isizatho sokuthi aphume kunkulumo zokubumba uhulumende lo njengoba abantu ekade bethunjiwe sebeveziwe njengokukhuthaza kwakhe njalo bamiswa emthethwandaba.
