Icele leMDC elikhokhelwa nguMnu Morgan Tsvangirai lithi seliphendule incwadi kaMongameli Mugabe ayilobe ngeviki edluleyo enxusa uTsvangirai ukuthi afungiswe, ukuthatha isikhundla sokuba yinhloko kahulumende womanyano.
Kulincwadi icele likaTsvangirai lithi litshele uMugabe ukuthi lifuna isisekelo sombuso siguqulwe ngokugcweleyo sicande indlela yokubunjwa kukahulumende womanyano phakathi kweZanu PF leMDC, njalo lezikhalazo zalo zonke zilungisiswe kuqala uTsvangirai engakafungiswa.
Ngaphandle kwalokho, icele lelli lithi uTsvangirai kasoze avume ukufungiswa athathe isikhundla sakhe sokuba yinhloko kahulumende lo. Uzulu yena uthi ukhangelele ukuthi uhulumende lo abunjwe ngokuphangisa kulungisiswe indubo abhekane lazo.
UMugabe ubethumele njalo incwadi kucele leMDC elikhokhelwa nguMnu Arthur Mutambara elinxusa ukuthi limnikeze amagama alabo elifuna babe ngabaphathintambo kuhulumende womanyano.
Kodwa unobhala jikelele waleli cele uMnu Welshman Ncube uthi kumpendulo yabo, batshele uMugabe ukuthi kumele abize umhlangano loMutambara kanye loTsvangirai bakhulume ngodaba lwabaphathintambo lolu, hatshi ukuthi bakhulumisane ngezincwadi.
Isiphathamandla seZanu PF, uMnu Joram Gumbo usole kakhulu ibandla leMDC, ikakhulu icele elikhokhelwa nguMnu Tsvangirai, esithi sokuzikhanyela ukuthi kalizinikelanga ukungena kuhulumende womanyano.
