Ingcwethi kwezokulima zithi umnyaka ka 2009 uzakuba ngomunye umnyaka wendlala ngoba isivuno sizakuba phansi kubangelwa yikwehluleka kwabantu ukulima kuhle. Eyinye yalezingcwethi nguMnumzana Renson Gasela ongumsekeli wesikhulumi secele leMDC ekhokhelwa nguMnumzana Arthur Mutambara oke waba ngumqondisi wenkampani yeGrain Marketing Board.
Embikweni kaGasela owethulwe namhla uthi inengi lehlulekile ukulima ngenxa yokusilela kwenhlanyelo, imvundiso yama fertiliser, idiesel lokunye okufunekayo kwezokulimisa. UGasela uthi ngakhoke indlala ibhahile njalo lonyaka njalo ilakho ukudhonsa kuze kube nguApril ngo 2010. UGasela uxwayisa uzulu ukuthi amalungiselelo okulima lonyaka ahle aqale masinyane ukuze kuvinjwe indlala eminyakeni ezayo.
UBrenda Moyo weStudio 7 ukhulume loNkosazana Nomalanga Khumalo omela isigaba seMzingwane edaleni lephalamende othi esigabeni sakhe izakhamizi zithole inhlanyelo ehluleke ukumila.
