UMongameli Robert Mugabe ukhangelelwe ukuhlangana labakhokheli bamacele womabili eMDC uMnu, Morgan Tsvangirai loMnu Arthur Mutambara kunsukwana ezizayo bekhulumisana ngodaba lokubunjwa kukahulumende womanyano.
Umhlangano lo ubikwa ulakho ukwenziwa ngemva koweSadc, wona olakho ukwenziwa ngeviki ezayo. Abazi ngokwenzakalayo bathi umhlangano wabathathu laba ulakho ukuqhutshelwa eVictoria Falls.
UTsvangirai yena ube lomhlangano leziphathamandla zebandla lakhe lamuhla eSouth Africa bekhulumisana ngokuthi beqhubekele phambili njani ngodaba lohulumende womanyano.
Asenelisanga ukuzwa ukuthi zinqumo bani eziphumileyo kulumhlangano, kodwa abazi ngokwenzakalayo bathi kulokudonselana ekuthini icele leli lingene kuhulumende lo izikhalazo zalo zingalungisiswanga kumbe hatshi.
Ingcwethi ecunungula ezombusazwe, uMnu Brilliant Mhlanga utshele uNtungamili Nkomo weStudio 7 ukuthi uTsvangirai engaba enze iphutha elikhulu kakhulu enganquma ukuthi aphume kunkulumo zikahulumende lo.
