Umqeqetshi weqembu lenguqu leMonomotapa, uNorman Mapeza setshiye umsebenzi. UMapeza, yena oqeqetshe leli qembu kakuhle kakhulu nyakenye lathatha inkezo yePremier Soccer League (PSL) utshiye umsebenzi ngolweSibili.
UMapeza ubikwa etshiye umsebenzi ngenxa yokufuthelana okubekhona phakathi kwakhe lomnini qembu uMnu Solomon Mugavazi. Osaphethe isikhundla esitshiywe nguMapeza okwamanje ngu Rodwell Dhlakama.
Iqembu leli lizaqalisa imidlalo yalo ye African Champions League mhlaka 1 ngenyanga ezayo lapho elidibana khona leqembu lase Zanzibar, i Miembeni enkundleni ye Rufaro eHarare.
Laloba kulokwesabela ukuthi ukutshiya umsebenzi kukaMapeza kulakho ukuphazamisa leli qembu, unobhala weMonomotapa uDavid Makombe utshele uNtungamili Nkomo weStudio 7 ukuthi lokhu kakusoze kuphazamise lakancane amalungiselelo emidlalo yaleliqembu.
