Ilunga leZanu PF eledale leSenate elimela isigabe se Seke – Chikomba, uNkosikazi Gladys Mabhiza ubotshiwe esetheswa icala lokuthengisa imvundiso emele iphiwe uzulu kungelambadalo.
Limvundiso kunye lenhlanyelo kwaphiwa ilizwe leZimbabwe ngele South Africa phansi kohlelo lokuphathisa abalimi ngenhlanyelo lemvundiso okwemali eyizigidi ezintathu zama rand.
UMabhiza, oleminyaka engamatshumi amahlanu lambili,52, ubikwa wathatha amasaka angamakhulu amabili lathoba minwe mibili wasethengisa emkambo wensitha isaka linye elithengisa ngamadola akweleMelika angamatshumi amahlanu.
Kuviki edluleyo okhokhela ikhomidi ebona ngokwaba ezokulimisa, uBrigadier Douglas Nyikaramba utshele umsakazo weZBC ukuthi kulamalunga eZanu PF edale lephamalemde athoba minwe mibili lenkokheli yabebutho abakhangelelwe ukubotshwa besetheswa icala lokuthatha ezokulimisa ezabiwa kungelambadalo bezithengisa emkambo wensitha.
Ingcwethi kwezemithetho njalo eligqwetha elilodumo, uMnu. Job Sibanda utshele uChris Gande weStudio 7 ukuthi amalunga edale lephalamende aweZanu PF alakho ukulahlekelwa yizihlalo nxa engatholakala elecala.
Ezinye izindaba zeStudio7 …