Umkhokheli welinye lamacele eMDC, uMnu Morgan Tsvangirai ngoMvulo uhlangane lenkokheli yenhlanganiso ezizimeleyo, ezigoqela ezezifundi, izisebenzi kanye lezilwela ilungelo loluntu echasisa ngokuthi kungani ibandla lakhe selize lavuma ukungena kuhulumende womanyano lebandla leZanu PF kanye lecele leMDC elikhokhelwa nguMnu Arthur Mutambara.
Abazi ngokwenzakalayo bathi abenhlanganiso ezizimeleyo laba badabukene phakathi phezu kwenyathelo likaTsvangirai, abanye besithi bekungamelanga avume ukungena kuhulumende leZanu PF, kukanti abanye besithi wenze kuhle ngoba uhulumende womanyano kunguye yedwa olakho ukulungisisa indubo ezikhona elizweni.
Kodwa isikhulumi secele likaTsvangirai uMnu Nelson Chamisa uthi abenhlanganiso ezizimeleyo abanengi bayamsekela uTsvangirai. Amazwi la agcizelelwe nguMnu Benjamin Nyandoro, yena obona ngokwethulwa kwemibiko kunhlanganiso ye Crisis in Zimbabwe Coalition.
Kunjalo nje kubikwa kuyisisanasana kunhlangotho zombili zeMDC laku Zanu PF amalunga ekhankankasela ukuthi akhethwe yinkokheli yamabandla la ukuba ngabaphathintambo, ama ministers. Ingcwethi ecubungula ezombusazwe uMnu Samukele Hadebe, ongumqeqetshi e University of Zimbabwe, uthi lokhu akumangalisi ngoba ngempela zifunakala izikhundla.
