Unobhala jikelele weUnited Nations uMnu Ban Ki-moon sekhuthaze uMongameli Robert Mugabe
ukuthi akhulule bonke ababotshelwe ezombusazwe abafana labonkosazana Jestina Mukoko laboMnu Roy Bennett.
Ekhuluma lentathelizindaba ePretoria kweleSouth Africa ngemva kokukhulumisana loMongameli Kgalema Motlanthe ngodaba lweZimbabwe ngolweSithathu, uMnu Ban uthe iUnited nations ikhathazeke kakhulu ngezehlakalo zeZimbabwe.
Uxwayise ukuthi kuzakuba nzima ukuthi amazwe omhlaba ancedise eleZimbabwe nxa labo ababotshiweyo bengaqhubeka bevalelwe. Lokhu bekungokwakuqala ukuthi uMnu Ban ethekelele ezansi yezwekazi leAfrica selokhu ekhethwe ukuba ngunobhala jikelele weUnited Nations ngo 2007.
Kudaba olufanayo, iqula leUnited nations ebelise Zimbabwe ukuyahlolisisa ngomumo ligqibe ukuhlolisisa kwalo ngolweSithathu lazisa intathelizindaba emhlanganweni oqhutshelwe eHarare ukuthi lifumene ukuthi uzulu weZimbabwe ubhekane lobunzima obumangalisayo.
Leliqula ligcizelele lathi kudingakala imali engange US$500 million eyokuvuselela ilizwe. Kolunye udaba olufanayo, abaphathintambvo ababona ngezemali kumanyano weSADC bahlangene izolo eCape Town bekhulumisana ngokuthi iZimbabwe ingahlengwa njani ebunzimeni ebhekane labo.
