Inhlokoka hulumende uMnu. Morgan Tsvangirai ubhoda-bhode esibhedlela se Harare General lamuhla ehlolisisa ukuthi isimo kwezempilakahle simi njani.
UMnu. Tsvangirai ubekhatshwe yiziphathamandla zebandla lakhe ezigoqela umsekeli wakhe uNkosazana Thokozani Khupe kanye lo Mnu. Henry Madzorera, osengumphathintambo kahulumende obona ngezempilakahle lokulondolozwa kwabantwana.
Lokhu kwenzakala inani labantu asebebulewe ngumkhuhlane we cholera seliqonge lafika phose inkulungwane ezine njalo elabahlaselwe yilumkhuhlane ledlula inkulungwane ezingamatshumi ayisitshiya ngalombili.
UMnu. Tsvangirai usole uhulumende kamongameli Robert Mugabe ngokubhidlika kwezempilakahle kanye lokumemetheka komkhuhlane we cholera.
Umlaleli we Studio7 uMnu. Mmeli Tshabangu, oyisizalwane se Zimbabwe esihlala e South Africa, utshele uSithandekile Mhlanga we Studio7 ukuthi ulethemba lokuthi ugatsha lwezempilakahle luzavuswa nguhulumende womanyano omutsha.
