Izikolo zemaphandleni ezinengi zilokhu zivaliwe ngoba bengekho ababalisi lanxa bekukhangelelwe ukuthi zivulwe kule iviki,okungafani lasemadolbheni lapho abantwana asebeqalile ukufunda kulandelwa ukubhadalwa kwababalisi ngeviki ephelileyo. UThabang Mathebula usethulela lolu daba.
Silokhu sikudaba lwezikolo, lanxa inengi lamatitshala seliphindele emsebenzini abantwana besikolo abanengi babikwa bexotshwa ezikolo ngoba bengabhadalanga imali yama fees kumbe ukuthenga amabhuku.
Kodwa uhulumende wazise izolo ukuthi akumelanga baxotshwe ngenxa yokwehluleka ukubhadala imali. Umphathintambo wezemfundo, uMnu. David Coltart utshele istudio seven ukuthi kusasa uzahlangana lenkokheli yenhlanganiso yamatitshala ukuze bahluzisise okwenzakalayo ezikolo.
Omunye umzali, uNkosikazi Rita Ndlovu utshele uChris Gande westudio seven ukuthi njengabazali bazakhuthaza uhulumende ukuthi engavali izikolo ngenyanga ezayo ukwenzela ukuthi abantwana bafunde okweneleyo.
