amalinks wokungena

Breaking News

UTsvangirai Uthi Uhulumende Kumele Ahloniphe Ilungelo Loluntu


Uhulumende womanyano obunjwa yiZanu PF lamacele womabili eMDC kumele ahloniphe ilungelo loluntu, imithetho yelizwe kanye lesisekelo sombuso kuthi amapholisa lawo atshiyane lomkhuba wokuhlukuluza uzulu mahlayana, kutsho inhloko kahulumende uMnumzana Morgan Tsvangirai.

U Tsvangirai wethule amazwi la edaleni lephalamende ngolweSithathu embikweni wakhe wakuqala kulelidale kulandela ukufungiswa kwakhe ngolweSibili ukuba lilunga. UTsvangirai ukhuthaze njalo amazwe ethulele iziphathamandla zeZanu PF izijeziso ukuthi esule lezizijeziso yikho ukuthi uhulumende enelise ukuvuselela ilizwe.

Waphinda waxwayisa ukuthi udlakela olukhona kumele luphele, esithi lungaqhubeka loludlakela amazwe angaba elesifiso sokuphathisa eleZimbabwe ukuthi livuselele inotho yalo, kasoze akwenze lokhu. Uthi njalo uhulumende womanyano kumele alwisane lokungethembeki kwezenotho.

Uphinde wasola kakhulu ukuthunjwa kwamapulazi abalimi abamhlophe esithi kumele kumiswe. Umeli weNkayi South edaleni lephalamende uMnu Abednico Bhebhe utshele uNtungamili Nkomo weStudio 7 ukuthi umbiko kaTsvangirai wamukelwe ngenjabulo ngamalunga aleli dale. Ukuwubala ngokugcweleyo umbiko kaTsvangirai hamba kukheli ethi www.zimbabweprimeminister.org.

UNtungamili uphinde waxoxa lengcwethi ecubungula ezombusazwe uMnu George Mkhwananzi yena othi ngempela isifiso sikhona kuMDC esokuthi uhulumende lo aphumelele, kodwa uthi iZanu PF ikhanya isilela njalo uthi kaboni uMugabe ebambana leMDC ekunanzeni ilungelo loluntu.

Ezinye indaba zeStudio 7...


XS
SM
MD
LG